Thursday, August 25, 2011

Vola Vanua 11th Edition

Ni bula vinaka tale na wekaqu. Sa la’ki veitalanoataki ena bose vakoro mai Yacata na i VOLA VANUA, ka liutaka na Turaga Roko Tui Cakaudrove. Eso era kaya ni sa vakatubu ca veiwekani na i VOLA VANUA.
Ni bera na i VOLA VANUA sa tu oti na ca ena dui lomamuni. O ira na tukamuni, na tamamuni era sa dui mate kaya tu na nodra loma ca. Ko ni colata voli mai na dui luvedra kei kemuni na makubudra na nodra ca. Na cava me qai mai beitaki kina na VOLA VANUA?
Na i VOLA VANUA e vakaraitaka tiko na leqa e dodonu me na ciqomi ni cala, ka me vakasavasavataki meda sereki kina.
Veivakalolomataki Vei Iratou na Tamaqu

  • Sega li ni a vakamai na draya ni niu nei tamaqu mai Waisoata? Sa suka lesu na bukawaqa.
  •  Sega li ni a virilaki na nodratou vale na tamaqu mai vei kemuni eso era se bula tiko ni kua? Ena suka lesu na vatu.
  • Sega li ni a basu na boto nei tamaqu? Sa dromu oti na boto.
  • Sega li ni a butakoci na vuaka nei tamaqu? Sa qai levu ga na nona manumanu.
  • Sega li ni a kacivaki e loma ni koro e so na vosa rogorogo ca mai vei ira na tamamuni? E na suka lesu na vosa.
  • Sega li ni rau a vakamavoa taki rau na vugoqu momo Misa kei momo Caka, na mavoa se tiko voli ga na gauna qo.

E la’ki vakatutusa vei au na vugoqu Momo Delai  Vulakoro ena nona kerea na noqu veivosoti ena vuku ni ka a caka tu vei iratou na tamaqu. E la’ki vula vica voli vei keitou mai Tavua ka’u solia mai vua e dua na nona boto me la’ki vukea na bula mai na koro.
Mai vakaraitaka vei au o Tamai Mila na ka vakaloloma eratou a dau cakava vei iratou na tamaqu, ka kerea na noqu veivosoti, ka ni dau tukuni vei iratou na ka ca me ratou cakava vei iratou. Me vaka au vola toka e cake, sega vakadua na kena veivakaqaqai vakalawa, ni vale ni walesi eratou lewa toka ga e dua na vuvale. Eratou cola galugalu tu na tamaqu na ka ca e dau caka vei iratou me yacova na nodratou mai yali ena vakacegu. Au sa ciqoma na vakatutusa nei Momo Delai kei na Vugoqu Tamai Mila. Au sa raica na savasava ni lomadrau.

Na cava na ka ca eratou cakava na tamaqu vei kemuni? O iratou na tamaqu eratou tamata liga qaqa ni ratou wereca na keitou vanua, tea na keitou niu, taya ka sigani se vavi ena draya, me tara kina na neitou vale. Eratou colata na Vanua, Lotu kei na Matanitu me yacovi keitou mai na luvedratou ka keimami na taukena na kena vinaka ni kua.

Black List Mai Viti


Sa rogo mai na bose vakoro me’u sa Black List me’u kua ni butuki Viti tale. Na ka eratou a cakava vei iratou na tamaqu era sa baci via cakava vei au. Isa na cava na noqu cala? Na noqu butuki Viti e sega ni nomudou se noqu me’u lewa. Au tamata sa vota mate era dau kaya na qase. Au sa talai meu i Talai ni Kalou Bula. Na noqu butuki Viti e sega ni noqu me’u lewa, e lewa na Kalou e talai au. E sega soti ni ka bibi me’u butuki Viti tale se sega, ka e bibi ni sa noqu na vanua yalataki ka solia vei au na noqu Kalou e talai au. Dou rerevaka me’u butuki Viti? Dou kua ni rerevaki au, dou rerevaka na Kalou e talai au tiko. Au wekamudou ga ke’u mani yaco yani au na la’ki sikovi kemudou.

Sa noqu masu: - Tamaqu vosoti ira na wekaqu era cakava na ka ca vei iratou na tamai keitou? Au sa vosota na nodra malumalumu. Kemuni kece na taciqu na ganequ, mo ni vosoti ira, kemuni kece na luvei keitou na makubui keitou, meda vosoti ira era caka cala vei keda me vaka sa vosoti keda oti na Turaga ko Jisu na Karisito. Ni qarava vinaka na Kalou kei na vanua ko ni sa bula kina.

Naki ni Vola Vanua

NA I VOLA VANUA e dusia na i tekivu ni ka e yaco mai Yacata, ka sai koya oqori na vanua meda tekivu kina. Au sega ni bulia e dua na ka vou. Na i tukuni makawa ga ni vanua o Yacata ,ni levu na i tukuni e sega ni volai ka yaga me kilai ka maroroi me baleti ira na luve i Yacata era muri mai.
Au doka na nomuni vavadewa, sa yavutaki ga e na ka e tu lomamuni. Ke savasava na lomada e na savasava na noda raica na ka. Ke duka e sa na duka ga na noda rai. Ni maroroya na lomamuni me savasava.


NA VEI KA ESO E DUSIA TIKO NA I VOLA VANUA

  • Na vosa bubuluitaki ni vanua o Yacata, ocei e vosa bubuluitaka?
  • O cei a sega ni vakatarai me vosa?
  • A cava e vagalui kina me vosa o Tevita Vakalutucua ka ni qase duadua?
  • A cava e qai kaya e na nona vosa? O Yacata e na qai vadodonutaki koya mai muri?
  • A cava e sega ni saini kina o Lote Vulakoro e na i tukutuku raraba?
  • A cava erau sega kina ni vakatara me saini o Lote Vulakoro, o rau na turaga erau a saintaka na i tukutuku raraba kei Yacata?
  • A cava erau kila me baleti Lote Vulakoro ka yaga me kilai? [Era dau kaya na qase]
  • A cava era lutu kina na i tukutuku raraba kei Kaibu kei Vatuvara?
  • A cava e mai veisau kina o Nukutolu kei Nukuluve ni rau yanuyanu nei Tui Daku. Erau qai tadu mai nai lakolako mai Vuna kei Qamea sa dau qoli voli o Tui Daku mai vei rau na yanuyanu qo[ yaca buli = Tu-i-nukutolu]
  • A cava era qai vosa kudrukudru voli kina na qase ni sa oti na veitarogi vanua mai Naselesele?
  • Vakacava o rau na vosa bubuluitaka na i tukutuku raraba? E vei o ira na kena kawa? Kawa boko?
  • Na cava e bokoci kina na i tokatoka Nalovotu?
  • Sega li ni o iratou na Sau Turaga?
  • Cava me mai yaco ga kina vei Tua Soge na Sau Turaga ni ra se bula tu na kena kawa?
  • Na cava e bokoci kina na mataqali Naseicake me sa dua ga na i tokatoka?
  • Na cava e mai lutu kina na i tokatoka Namoli, na i karua ni tokatoka ni mataqali Dakuicake?
  • E veisau vakacava na i liuliu ni tokatoka Nabua ka ni a dau kena i liuliu toka ga o iratou mai Malolo?
  • Sa e vei na i tokatoka o Dakuicake erau dau kaya voli o Momo Aisea kei Momo Delai?
  • Na cava era mai leqa kece kina na sasaga ni vanua ko Yacata? Duri ga davo!
  • Na sitoa ni Koro?
  • Sitoa ni soqosoqo?
  • Tubu cake na gone vuli ni Yacata era lutu dole!


Gadrevi Ga Me Wali Na Leqa



E sega ni rawa ni da walia na leqa ke sega ni kunei na vuni leqa.

 Sega ni naki ni VOLA VANUA me veisautaka e dua na i tuvatuva sa tu oti tu. Na i naki levu ga meda sauma na taro, ciqoma na cala era cakava na qase, muri na kena sala vakavanua, na Matani gasau ka vakatutusa me ciqomi ka bokoci na nodra cala na qase meda bula na luvedra kei na makubuna.


Au se bula me’u vosa, me’u vosa me vakasavasavataki na vanua.

  • Au a sucu mai ka sega ni matata noqu vosa.
  • Na cava e qai sereka kina na wa ni yamequ na Kalou me’u vosa matata?
  • Na cava au sega ni mate kina ena noqu coqa ena motoka? E vabulai au tiko na Kalou e na nona i naki. Au lutu e na waqavuka ka’u bula.
E maroroi au tiko na Kalou ni se tiko na kequ yaga. Au vosa tiko e na gauna qo ni tiko na dodonu vei au me’u vosa [Freedom of speech and expression].

Noqu Masu Me Bula Sautu o Yacata Ka Meda Sereki Kece Mai na Vei Ka Eda Vesuki Tu Kina Mai Na Nodra Cala Na Noda Qase.

Tuesday, August 16, 2011

10th Edition Tokatoka o Nabua





Ni bula tale na wekaqu mai na dela ni yavu. Sa toso tiko na gauna ka kauta tiko mai e vuqa na i tukutuku lasu meda mai vakalolomataki tu kina.

Liuliu ni Tokatoka Nabua

Ni ra se bula na tukada sega ni se bau rogoci tu ni Liuliu ni tokatoka Nabua o Tua Lote. Ratou mai yali yani na tamadatou, vugodatou sega ni bau rogoci tu e dua na lasu levu va qo. Macala tu ga mai ni liuliu ni Tokatoka Nabua o ratou mai Malolo ka bula toka ni kua o ratou na kena kawa ka liuliu toka o Aminiasi Mateiwai.

Rau se bula o Momo Aisea kei Momo Delai sa dau rorogo tu ena vosa ni tubetube ni dua tiko na i Tokatoka o Dakuicake. Sa ivei ni kua? Kena i balebale ni rau a lasutaki keda tu mai na vugoqu sa rau mai yali qo ka sa kauta cake tale mai o Umu ni o Tua Lote e liuliu ni tokatoka Nabua. Kena i balebale Umu ko sa kaya ni rau a lasu tu mai na qase sa mai yali qo.

Nai vola Volai sa lasutaki keda. I’a nai VOLA VANUA e sega ni rawa ni lasu. Vakasarava toka, lomani ratou na luvemu kua ni mai kauta cake tiko e dua na lasu ka na kauta mai na kawaboko ni nomu kawa. Kakua ni vaqitora na Vanua kei na Lotu ni oqori e dua na ka rerevaki. Au vakasala tiko ka na maroroi tu na noqui vakasala me ra na qai wilika nai taba era na muri mai na rerevaki ni vaqitora na Vanua kei na Lotu.



Mei vakavuvuli vei keda na luvei Yacata; O Ratu Paula Raikaki kei Tuvuwai Levu rau a sainitaka e dua na i tukutuku lasu ka sega ni lasa. Na Lasa kei na Lasu erau duidui ka duidui talega na kedaru i balebale. Na kena Lasa e na sega ni kauta tani na kena Lasu. Na Lasu e na kau tani ga ni sa vakadodonutaki vakavanua ena kena i vakarau na matanigasau. Ni da kila ni sa cala na ka eda cakava, meda ciqoma ni cala (admit). Ni oti qai cakava na nomu i vakarau mo vakatutusa (confess). Na yalo kaukauwa kei na yalo kocokoco eda bese kina ni ciqoma ka da bese talega ni vakatutusa.



Na i vosavosa vakaviti eso:

·         “lutu na niu ka lutu ki vuna”

·         “dui seva ga na bua eda tea”

·         “lauti koya ga na sui ni kena”



Noqu i vakasala vei iko tavale Umu:

·         sega ni dua na betena vei iko na ka lasu ko kauta cake tiko mai qori;

·         ko sa liuliu toka ni Mataqali, qarauna de na qai luvati tani vei iko;

·         qarauna de ko na kawaboko kina;

·         rogoca noqu i vakasala, kua ni qai veivutuni sa bera.



Dau na gauni sala ni nodra tobo na maqe ni Aferika, me biu na pinati e loma ni niu sa gunuvi oti na kena su. Era qai dau suluta na maqe ena ligadra ruarua mawi, matau. Era sega ni via solia ni sinai tu na ligadra qai mai oso tu e loma ni niu ka sega ni rawa ni ra kaba cake i vunikau me ra dro. Era qai mai vesu yani.



E kaya e dua na vuku [“Life is not what you accumulate to yourself, it is what you share to others that makes life valuable”]. Kakua ni mataboko me vaka na maqe me sinai na ligamu ruarua ni oqori sa nomu i bulubulu. Vakasuka na ka e sega ni nomu mo bula kina. E na sega ni dua ena vosa vakadodonu vei iko. Mo drau wilika vakaveiwatini na noqu i vakasala qo ka mo drau masulaka me yaco kina na loma ni Kalou. Kakua ni lomada ga vakatamata. Na sala sa dodonu vua na tamata sa kena i tinitini na rusa.

Na noqu lomani kemudrau au vakasala tiko kina qo ka sega ni ka walega qo na noqu nanumi kemudrau. Drau sa kila tiko na noqu dau nanumi kemudrau me baleta na vuli ni luvemudrau. Oqo tale na noqu i vakasala kina nomudrau digidigi.

Au vosa tiko e na noqu kila na nodatou veiwekani.

·         Nau Filo e ganei Tua Inoke mai Malolo ka luvena o Momo Samuela Taione. Na luvena e watimu tiko qori. O Tua Inoke na tamai tinaqu, o Merewalesi Didrau. Na luvena e vakasala tiko yani qo.

·         Ena yasana vei tamaqu, e qase o tukaqu Ilaitia Bale ka luvena o Taione Lave na tamaqu. E gone vei Ilaitia Bale, o Nau Kuva, ka luvena o Aisea Tikoilau, na nomu i tubutubu turaga.

·         Ke’u taura tale vua na nomu i tubutubu marama: O Tua Inoke kei Nau Tema e rau veiganeni ka luvei Nau Tema o Nana Loloma na nomu i tubutubu marama.

O kemudrau na tavalequ dina vakadra ka sega ni noqu i naki me’u vakacacana na veiwekani baleta au vakasalataka na Vanua kei na kena veiwekani ka me’u kua ni na qai tarogi kina. Au kila ni levu na kena meca ni sa dau kena i vakarau. I’a au sega ni tu vakasuka kina ni’u kila na noqu i vakasala e na savasava kina na Vanua.

O kemudou na gone mai Mawaraka kei Cikobia dou rogoci au. Na nomudou kaukauwa i Yacata o iratou na i Tokatoka Nabua kei na i Tokatoka Namoli. Mo dou maroroya ena qai maroroi kemudou.

O iko Mate, na i Liuliu ni Tokatoka o Nabua kua ni galu. Mo tukuna tiko na ka dina, ko na vakabula kina eso na vuvale. Na ka dina e ra dau tukuna tiko mai na tukadatou era sa yali yani. Nai Vola Volai sa mai vola ga na tamata ka veiveisautaka na tamata. Kevaka o Galu, e na Sinai o Yacata e na Galu kei na Kawaboko. Ke o Galu era na vosa mai na Vatu. A sereka na gusu ni Asa na Kalou ni sa cala na i lakolako dina ni sega ni dau vosa na Asa. Io sa lewa na Kalou me vosa me dodonu na i Lakolako.

E gone o tinaqu kei tamaqu ena vuvale Nabua kei Namoli. I’a au sa vosa me rogoci me dodonu na Vanua. Au kerea mo dou vosoti au na wekaqu ke rewa i cake na noqu vosa. I’a sa gu na yaloqu mo ni bula na wekaqu. Au dau taroga se cava e sega kina ni kauta tani kina na Kalou na noqu bula ni’u se qai sucu mai? Na cava au sega ni mate kina ni’u a coqa ena motoka, au a lutu ena helicopter ena vanua ni kaulotu? I’a au se bula voli ga qo. Nona i tuvatuva na noqu Kalou me’u cakava na lomana e vuravura ni kaulotu, kina noqu Vanua lomani talega. E se vo tiko na ka e gadreva na Kalou me’u cakava. I’a me nona ga na Kalou na cecere dokai kei na lagilagi.

Sa buli oti na Turaga na Tui Yacata ka sa vakadonua na Turaga Tui Cakau, na Vuvu ni Vanua o Cakaudrove, na veibuli. I’a eso era sega tiko ni ciqoma. Noqu i vakasala ni lesu mai ni vakatutusa vua na Turaga Tui Yacata. Sa ciqomi mai na Vale ni Volavola ni Veitarogi Vanua ka sa sitabataki oti ni sa ciqomi na veibuli ena i ka 8/8/11. Na vula vata a sainitaki ka bubuluitaki vakailasu kina o Yacata ka sa mai 70 na kena yabaki.

Sa mai buli na i karua ni Tui Yacata e kilai mai na Vale ni veitarogi Vanua. Matai o Ratu Paula Raikaki ka kena i karua o Ratu Koroi Radredre. E rua na veibuli sa caka oti e sega ni kilai vakamatanitu mai na kena valenivolavola. I’a sa oti koya, meda vakanadakuya ka meda kila tiko na lewe ni vanua o Yacata ni veibuli kece vei ira na Masi ni Vanua era na kila na i Liuliu ni Vanua o Lalagavesi.

Nai vola ni veibuli a mai maroroya voli ga na Roko Tui Cakaudrove 28/12/2010. E dua na kena lavelave a maroroi voli ga mai vei iratou na mataqali Turaga ka sa qai la’ki soli ka sitabataki ni sa ciqomi. E dua na kena lavelave sa vakau vua na Turaga Tui Cakau, ka dua vua na Loya na dau ni vakasala vakalawa Nemani, kei koya na loya e Townsville. Au na qai vakamacalataka tale yani na macala ni nona vakatulewa na dauni vasala valawa ni nodatou vanua.

Ni vakacegu mada na wekaqu. Me sautu na bula ka me cecere tikoga na Turaga ko Jisu na Karisito.
 
 
 

Tuesday, August 2, 2011

Vola Vanua Wase Ciwa

Au vakabula tale yani vei kemuni na wekaqu koni dau wilika tiko na VOLA VANUA; Au nanuma meu vadeitaka tale na I naki ni tukutuku oqo,e sega ni kenai naki meda mai veicati kina me vaka era kaya eso. Na nomu cata edua sa tu oti tuga e lomamu, e sega ni vakavuna o VOLA VANUA; O VOLA VANUA e nanuma me vakasavasavataka na  leqa e tiko qori e lomamu, ka sa vosa tiko mai vei iko ena leqa e yaco tiko ena nomudou vuvale, tokatoka mataqali yavusa. Na mate ni Kawa, Na kawa boko, na Galu veitaravi, na leqa ni veika ni veivamaduataki; na vuli lutudole, duri ga davo ni veika vinaka e tovolei me da tara vata; ke yaco tiko qo, sa yaga meda yadra taroga nai lakolako makawa, na cava sa mai yaco tiko kina vei kedatou na vei leqa vaqo?

Parofita:
E na noqui tutu vaka Parofita, sa dei na yaloqu meu dusimaka na vanua ni sa leqa tiko nai lakolako; vei kemuni koni cati au, qori na nomuni dodonu moni cati au, ia na noqu dodonu meu lomani kemuni kei na noqu lomana na nodatou vanua;
Turaga Tui Cakau:
Au vakavinavinaka vei kemuni koni cati au, koni basika vua na Turaga Tui Cakau me tarovi meu kua ni butuki Yacata tale, vinaka na loma ca, drau sa vakatakilai kemudrau ga kei na vuvale eda dui cavutu mai kina, au marau ga ni drau tavalequ ruarua, e rawa ni drau cakava ena lecai ka se dua e bukana tiko na kena buka, qori e kila ga na Kalou, kei rau veitalanoa kei na Turaga Bale Tui Cakau, sa dua naka na nona madua me vatu qo na nodratou nanuma a nona Qase mai Yacata.

Drau sega ni kila na tavalequ o Lalaga vesi e matata tiko vua na nona tagi Valu eratou siro mai kina na tukaqu mai Korotiki Yasana Vaturaga o Ra me mai maroroi o Lalagavesi; noqui Tokatoka Namoli kai Korotiki Mataqali Dakuicake (refer to Vola ni Kawabula)
Immigration Department:
Baci rua tale na tavalequ erau yaco kina Immigration Department e Suva ,  meu kua ni butuki Viti tale, laki tukuni kina bose vakoro mai Yacata; sa sega beka n aka vinaka me bosei ena bose vakoro,? sa laki bosei kina me vakoti kina Kauveilatai edua na luvei Yacata e solia tu na nona bula me baleti Yacata, ka Kaulotu voli ki vanua tani e na vuku ni Tukutuku vinaka kei Jisu?   Isa na yalowai kei na lecai ka, au sa loloma vei kemudrau na tavalequ lomani, Isa kemudou na tavalequ, dou kua ni cati au, au sega ni cati kemudou, ka levu na noqu lomani kemudou kei na noqu lamana na nodatou vanua, ke dou sa cati au, dou sa cata na na noqu Kalou e tuberi au cake mai Yacata sususgi au cake mai kina, kacivi au niu se bera ni kunekunetaki main a ketei tinaqu sa lesi oti meu nona Parifita; au kacivi kina Lotu Wesele mai Viti, Vuli ena kena Koro ni Vuli ni Vulitalatala mai Davuilevu, lesi au na Bose ko Viti meu Kaulotu ki vanua tani, kau tiko qo ena vanua ni Kaulotu;

Na noqu lako ki Viti se sega e nona na Kalou e talai au, e sega ni dua kina kaukauwa modrau lewa na noqu veitosoyaki,drau kua ni yalowai,

Vakasa kaukauwa:
E tu vei au na kaukauwa drau sega beka ni kila, keu na vakayagataka e na loma ga ni vitu na siga mai qo drau sa na curutoka kina e loma ni dua na rumu butobuto; isa au sega ni taleitaka me yaco qori, noqu masu me kua,  baleta ni drau wekaqu dina;

Matanitu kei na Lotu:
Au a tiko voli mai Viti ena veisureti me laki dua na veitalanoa kina Matanitu kei na Lotu Wesele me dua na veivakameautaki me caka, au nuitaka ni drau a rogoca na domoqu e na walesi; au sa mai vosa oti kina Matanitu oqo kei na Lotu Raraba e Ositerelia me baleta na veivakameautaki mai Viti.

Ositerelia:
Na cakacaka ni Kaulotu keimami qarava eke, e yaco kina na National Sorry Day e Ositerelia; rawa kina vua na Pime minister Keven Rudd me vakatutusa ni a cala n aka era a cakava taumada na I karua ni tawavanua vei ira sa tiko oti eke; a ciqomi na vakatutusa koya mai vei ira na I taukei ni vanua Aboriginal, ka yaco na veisaututaki kei na veisereki sa toso ko Ositerelia kina dua na I lakolako ni veisereki kei na bula vou.
Sauca Aferika:
O Sauca Aferika a yaco talega kina veivosoti, nira a vakatutusa na vul;avula vei ira na loaloa e na veivakalolomataki a yaco kina; digitaki o Mandela me liutaka na veisaututaki oqo;

Yacata:
O VOLAVANUA e dusia tiko e dua na malumalumu e tiko, ka yaga me vakasavasavataki, o kemudou na muri mai ni sa tawa toka na vanua; dou sa mai taura qo, dou bokoca qo, dou tosoya qo, dou mai vola qo, e donu tiko li kina mata ni Kalou? Au sega ni  taroga na kena donu Vakapepa Volai, au taroga tiko e donu li ena mata ni Kalou ka Bubuluitaki  vua nai tukutuku Volai qo? Ke a donu na bubului na cava e yacotiko kina na veileqa eso au sa cavuta toka mai cake?

Na donu ni Vola Volai e na tukuna tiko mai o Vanua Bula, ka tukuna mai vei keda na kena dina kei na  sega ni dina ni ka sa yaco oti; kei na veika sa yaco tiko ni kua

ciqoma vakatusa na I valavala ca:
Admit and confess: meda ciqoma ni tu na malumalumu, ia meda vakatusa me da savasava
Ke a sega beka ni noda malumalumu, ia sa nodra malumalumu na noda qase, sa mai noda kina na I samu ni dawa na I taba ni gauna qo; (Nemaia 1:6) Neh 1:6  Look at me, LORD, and hear my prayer, as I pray day and night for your servants, the people of Israel. I confess that we, the people of Israel, have sinned. My ancestors and I have sinned.

 E sega ni a kaya o Nemaia me mai Tui Isireli, e vakatusa ga na malumalumu nei Isireli mai vei ira na nona Qase era sa yali yani ka vuni nodra bobula;
Kemuni na wekaqu ena sega ni vukei Yacata na kena yaco wasoma na Veitarogi vanua, au sega ni beca na lewa ni veitarogi Vanua, au kaya tikoga e na vukei Yacata na nona raica tale naka sa caka oti, ka koto kina na malumalumu, ka yaga me vakasavasavataki;

E sega ni dua e vinakata na I tutu va tui Yacata me taura, e sega ni dua e vinakata me Sau Turaga, se Bati se dau vei buli, n aka e gadrevi me savasava nai lakolako, mera tubu main a gone ni mataka mera raica ni sat u na kenai vananumi ni sa cakaoti na veivakasavasavataki ni Vanua; sa dusia oti o VOLA VANUA na cava me caka
Dou siro ga me dua na veivakasavasavataki;meda vakamalumalutaki keda meda dau veiqaravi vinaka;  Au sa raica na siga era na dabe kina lewei Yacata e na loma ni koro me yaco na siga vinaka qo, ni maroroya na nomuni bula moni raica; o ira era sega ni taleitaka era na vagalalataki kin a kena yaco na siga talei ni veisereki kina gauna vou kei Yacata;

Ni vakacegu na wekaqu, loloma main a vanua ni kau lotu, vei kemuni na wekaqu koni kilai Ratu Jekesoni Yavalanavanua, dau kilai tu Koya mai Vei Jaina, sa kaulotu tiko qo main a Gulf of Capenteria, tavale Tuate ena kilai koya vinaka ni ratou tabacakacaka vata mai Nauluvatu;
Me noda vata na Loloma Levu ni Kalou ko Tamada kei na Luvena ko Jisu na Karisito, kei na Kalou na Yalo Tabu e daidai ka sega ni mudu. Emeni

Namaka na wase tini: